এলিয়েন সুন্দৰী কিৰিন

এলিয়েন সুন্দৰী প্ৰতিযোগিতাৰ ছেমি ফাইনেলিষ্ট 'কিৰিন' মিছ ইউনিভাৰ্ছ প্ৰতিযোগিতাত অংশগ্ৰহণ কৰিবলৈ পৃথিৱীলৈ নামি আহিল৷ এই প্ৰতিযোগিতা কত হ'ব, কেনেকৈ ৰেজিষ্ট্ৰেচন হ'ব কিৰিনে একো নাজানে৷ কেৱল এলিয়েন সুন্দৰী প্ৰতিযোগিতাত বিজয়ী হ'ব নোৱাৰাৰ পোতক তুলিবলৈ কিৰিনে পৃথিৱীলৈ ঢাপলি মেলিছে৷ কিৰিনে এফনেটৰ ত্ৰুগলত চাৰ্চ কৰি চালে নিশ্চয় গোটেই খবৰখিনি পালেহেতেন, কিন্তু লৰালৰিৰ কোবত তাইৰ সময়েই নহ'ল৷

কিৰিন আহিছে টৰেন্ট গ্ৰহৰ পৰা৷ এই গ্ৰহৰ প্ৰাণী সাধাৰণতে অতি বুদ্ধিমান, তথ্য প্ৰযুক্তিৰ ক্ষেত্ৰত অতি আগবঢ়া৷ কিন্তু কিৰিন অলপ ব্যতিক্ৰম, তাইৰ বুদ্ধি অলপ কম৷ কেৱল এফনেটত এই প্ৰতিযোগিতা খনৰ খবৰ পঢ়িয়েই তাই 'ফ্লাইং ফলচ্ স্কিনখন পিন্ধি পৃথিৱীলৈ নামি আহিছে, লক্ষ্য তাই নিজেওঁ নাজানে৷ একো চিনি নাপায় কিৰিনে ত্ৰুগুল ট্ৰেপৰ মতে আহি গুৱাহাটী নামৰ চহৰ এখনত নামিল৷

কিৰিনে এয়াৰ কেমোফ্লেজ মুডটো অন কৰিয়েই লেণ্ড কৰিছিল৷ ফলত স্বাভাবিকতেই কোনো মানুুহে তাইক দেখা নাছিল৷ তাইৰ শৰীৰত থকা ছফ্টৱেৰটোৰ দ্বাৰা পৃথিৱীৰ সকলো ভাষাকে কনভাৰ্ট কৰিব পাৰি৷ আৰু কিছুদিন আগতেই তাই 'অল ইন ওৱান' ভোকেল কৰ্ডদালো ইনষ্টল কৰি লৈছে৷ গতিকে কিৰিনে পৃথিৱীত আহি বিশেষ একো চিন্তা কৰিব লগীয়া নাই৷

কিৰিনৰ সন্মুখত এখন কিতাপৰ দোকান৷ এখন আলোচনীত এজনী ধুনীয়া ছোৱালীৰ ফটো দেখিলে, আলোচনীত লিখা থকা কথাখিনি তাই কনভৰ্টাৰেৰে পঢ়ি চালে, "কৰীণা, দ্যা ৰিয়েল বিউটি"৷ এই ছোৱালীজনাৰ নাম তাৰমানে কৰীণা৷ কিৰিনৰ বৰ মন গ'ল কৰীণাৰ লগত কথা পাতিবলৈ৷ তাই কৰীণাৰ ছবি স্কেন কৰি ছাউণ্ড ৱেব অন কৰি কথা আৰম্ভ কৰিলে৷

কৰীণাৰ কোনো উত্তৰ নাই৷ বোধহয় পৃথিৱীত ছাউণ্ড ৱেব মেছেজ কাম নকৰে৷ টৰেণ্ট গ্ৰহত কোনোবাৰ ছবি নিজৰ দেহত থকা বিল্ড ইন কম্পিউটাৰত স্কেন কৰি ছাউণ্ড ৱেবৰে মেছেজ কৰিলেই কথা কব পাৰি৷ এই মেছেঞ্জাৰৰ নাম Yoooo Messenger.

কিৰিন হতাশ হ'ল৷ কৰীণাই হয়তো কব পাৰিলেহেতেন এই প্ৰতিযোগিতাখন কত হ'ব৷

ইমানপৰে কিৰিন কেমোফ্লেজ মুড অন কৰি অদৃশ্য হৈ আছিল৷ গতিকে দোকানৰ মালিকে তাইক দেখা নাছিল৷ দোকানত থকা একমাত্ৰ গ্ৰাহক সাংবাদিক জনেও তাইক দেখা নাছিল৷

কিৰিনে ভাবিলে শ্বপ বীং ( Shop being) মানে দোকানীজনে এই প্ৰতিযোগিতাখন কত হ'ব সেয়া হয়তো জানিব৷ গতিকে তাই মানুহৰ ৰুপ ধাৰণ কৰাৰ সিদ্ধান্ত ললে৷ কৰীণা কাপুৰৰ ছবিখন স্কেন কৰা আছিলেই৷ সেই ছবিখনকেই 'ফেইচ কনভাৰ্টৰ' ফোল্ডাৰত পেষ্ট কৰি 'কনভাৰ্ট ইন হিউমেন' আইকনত ক্লিক কৰি এয়াৰ কেমোফ্লেজ মুডৰ পৰা ওলাই আহিল৷

দোকানীজন ব্যস্ত হৈ থকা বাবে কৰীণাৰুপী কিৰিনক দেখা নাপালে৷ কিন্তু সাংবাদিক মহোদয়ে ঠিকেই দেখা পালে৷ মুহুৰ্ততে পদোন্নতি, ব্ৰেকিং নিউজ, আপোনাৰ অনুভৱ আদি বিভিন্ন শব্দ সাংবাদিকৰ মগজুৰে পাৰ হৈ গ'ল৷ লগে লগে প্ৰশ্নবাণ আৰম্ভ হৈ হ'ল,
- কৰিণাজী আপ য়াহা?

কিৰিনে লেংগুৱেজ কনভাৰ্টাৰ অন কৰিলে৷ বীঙটোৱে সুধিছে, 'আপুনি ইয়াত কেনেকৈ'? কিৰিনে সাংবাদিকৰ মগজু স্কেন কৰি বিশুদ্ধ অসমীয়াত উত্তৰ দিলে,
- মোক মিছ ইউনিভাৰ্ছ প্ৰতিযোগিতা কত হয় সেই বিষয়ে খবৰ লাগিছিল৷

প্ৰশ্ন শুনি সাংবাদিক মহোদয়ৰ মূৰ ঘুৰি গ'ল৷ কৰীণা কাপুৰে সুধি আছে মিছ ইউনিভাৰ্ছ প্ৰতিযোগিতা কত হ'ব, তাকো অসমীয়াত৷ কিবা এটাতো গণ্ডগোল হৈছে৷ যোৱাৰাতি অলপ নিচা হৈ ৰুমীৰ লগত ফোনত কাজিয়া হৈছিল বাৰু৷ কিন্তু মাতাল হোৱা নাছিল সি৷ মাতাল অৱস্থাত থাকিলেও সি ৰিপৰ্ট থিকেই মেনেজ কৰে৷ আজি কি হৈছে একো বুজিব পৰা নাই৷
হয়তো ছোৱালীজনী কৰীণা নহয়, দেখাতহে সাইলাখ একে৷ অলপ বুৰ্বক যেন লাগিছে৷ মুহুৰ্ততে বিভিন্ন বুদ্ধি সাংবাদিকৰ মনলৈ আহিল, এটা ব্ৰেকিং নিউজ হৈ যাব৷ ৰুমীৰ লগতো লাহে লাহে ভাল নলগা হৈ আহিছে৷ এইবাৰ বিনয়ৰ অৱতাৰ হৈ সাংবাদিকে উত্তৰ দিলে,
- এই প্ৰতিযোগিতাখনৰ বিষয়ে ভালদৰে জানো৷ যোৱা দুবছৰ আমাৰ চেনেলটোৱেই লাইভ টেলিকাষ্ট কৰি আছে৷ মই আপোনাক সকলো ঠিক ঠাক কৰি দিম৷ আপুনি একেবাৰে ঠিক মানুহকে পাইছে৷

মিছা আজিকালি তাৰ মুখতে থাকে৷ কথাখিনি কৈ তাৰ নিজকে প্ৰতিযোগিতাখনৰ বিচাৰক যেন লাগি গল৷
কিৰিনে এইবাৰ ক'লে,
- তেনেহলে আপুনি মোক তালৈ লৈ যাব নেকি বাৰু?

তাইৰ কথা শুনি সাংবাদিকৰ মনত দুষ্ট ৰোমান্টিক বুদ্ধি খেলিবলৈ ধৰিলে৷ আগৰেপৰা এই খেল খেলাত সি পাকৈত৷

এইবাৰ নিউজ বীঙটোৱে তিনিচকীয়া এক অদ্ভুত যান এখন মাতি আনিলে৷ স্কেন কৰি চাওঁতে ড্ৰাইভাৰ বীঙটো ওচৰৰে দেশ এখনৰ বুলি গম পোৱা গ'ল৷ বিদেশী ড্ৰাইভাৰ!!! নিউজ বীঙটো বৰ পাৱাৰফুল হ'ব, কিৰিনে মনে মনে ভাবিলে৷ বীঙটোৱে উঠাৰদৰে কিৰিনেও যানখনত উঠি ললে৷

ৰিক্সা চলিছে সাংবাদিকৰ প্ৰিয় 'ক্লাব মিন্ট পাব'লৈ৷ এইফালে কিৰিন ভিতৰে ভিতৰে ৰোমাঞ্চিত৷

পাবত লৈ গৈ নিউজ বীঙে কিৰিনক পানীৰ দৰে কিবা খাবলৈ দিলে৷ তাই 'ফুড টেষ্টিং ৰে' ব্যৱহাৰ কৰি দেখিলে সেয়া খাব পাৰি৷ এগিলাছমান খাই তাই সোৱাদ পালে, গতিকে হিচাপ নোহোৱাকৈ খাবলৈ ধৰিলে৷

এইফালে সাংবাদিক নিজৰ প্লেনমতে গৈ আছে৷ তাইক মাতাল কৰি লব পাৰিলেই তাৰ কাম সহজ হৈ যাব৷ লাহে লাহে সি তাইৰ হাত এখনত ধৰিলে৷

কিৰিনে মন কৰিলে নিউজ বীংটোৰ গাৰ পৰা 'ৰোমান্টিক ৰে (ray)' বাহিৰ হৈছে৷ কিয় জানো তাইৰ পিংকিকৰ কথা মনলৈ আহিছে৷ পিংকিক তাইৰ বিশেষ বন্ধু৷ কিন্তু এতিয়ালৈ দুয়ো ফিটেড (Fitted) হোৱা নাই৷ পিংককে কৈছে আগন্তুক 'লাভ লাইট ডে'ত দুয়ো ৰেজিষ্ট্ৰেচন কৰি ফিটেড হ'ব৷

সাংবাদিকে সুধিলো,
- তুমি বিবাহিতা নেকি?

বিবাহিতা শব্দটোক কিৰিনে স্ক্ৰীণত দেখি ফিট বুলি বুজিলে৷
- নাই মই এতিয়াও বিয়া হোৱা নাই৷

ৰোমান্টিচিজম ৰে হয়তো নিউজ বীঙে বেছিকৈ প্ৰযোগ কৰিলে৷ কিৰিনে ধৰিব নোৱাৰা হ'ল৷ তাইৰ মনত পৰে তাই বীংটোৰ লগত বহুত নাচিলে৷ নাচৰ তালে তালে বীঙে তাইৰ টেম্পোৰাৰী স্কিন্ দুখনমান খুলিলে৷

- বলা মোৰ ৰুমলৈ যাওঁ৷ বীঙটোৱে কিৰিনক ফুচফুচাই কলে৷

কিৰিন নিউজ বীঙৰ লগত ধলং পলংকৈ তললৈ নামি আহিল৷ নিচাগ্ৰস্ত, কাপোৰ কানি অসংলগ্ন৷ পাবৰ তলতেই বহুত বীঙ ঘুৰাপকা কৰি আছিল৷ কিৰিনক সেই ৰুপত দেখি এচামে কিৰিলি পাৰি উঠিল, এচামে আকৌ অপসংস্কৃতি ৰোধ কৰিবলৈ লগে লগে আগুৱাই আহিল৷ মুহুৰ্ততে জনতাই কিৰিনক আগুৰি ধৰিলে, বেছিভাগৰে পৰা নিউজ বীঙৰ লগত খোৱা পনীয়বিধৰ গোন্ধ৷ চাৰিওফালে বীঙবোৰৰ চিঞৰ বাখৰ আৰম্ভ হ'ল৷

কিৰিনে দেখিলে নিউজ বীঙটো কৰবাত পলাল৷ তাইক আগুৰি ধৰা সকলোৱে বিভিন্ন ৰে তাইলৈ নিক্ষেপ কৰিছে৷ ৰে বোৰ যে ভাল নহয় সেয়া তাইৰ ইন্দিকেটৰে এলাৰ্ম দি তাইক সাৱধান কৰি দিছে৷

চাৰিওফালে হুলস্থুল৷ বিভিন্ন টুকুৰা শব্দ যেনে, মাৰ তাইক, চুলি খুৰাই দে, খোল খোল, ইহ একেবাৰে যেন কৰীণা হে এইবোৰ চাৰিওফালৰ পৰা উৰি উৰি আহিল৷ তাৰ মাজত ৰঙা টি ছাৰ্ট পিন্ধা এটা বীং এটাই কিৰিনৰ ফলচ্ স্কীণবোৰ খুলিবলৈ চেষ্টা কৰি জোৰে জোৰে চিঞৰি আছিল,
- ফিউজ লাইভ মাত , জল্দি জল্দি৷

টনা আজোৰা চলি থাকোতেই কিৰিনে দেখিলে নিউজ বীংটো আহি ওলাইছে, লগত এটা কেমেৰামেন বীং৷ এইবাৰ কিন্তু তাৰ গাৰপৰা ৰোমান্টিক ৰে ওলোৱা নাই৷ আগতে কেতিয়াও নাম নুশুনা 'অনুভৱ ৰে' তাইৰ গাত প্ৰয়োগ কৰি নিউজ বীঙে তাইক সুধিলো,

- মাজনিশাখন এই অৱস্থাত হাতে লোটে ধৰা পৰি আপোনাৰ অনুভৱ কেনে?

ইতিমধ্যে কিৰিনৰ ধৈৰ্য্যৰ বান্ধ খুলি গৈছিল৷ নিউজ বীংটোৱে দিনটো ভাল ব্যৱহাৰ কৰি হঠাৎ যে এনেদৰে স্কিন্ সলাই দিব তাই ভবাই নাছিল৷

তাই ক্ৰুগুলত পঢ়িছিল এই হিউমান বীঙবোৰ জীৱশ্ৰেষ্ঠ কেটেগৰীত পৰে৷ কিন্তু তাই পঢ়া শিয়াল, কুকুৰকেইটাতকৈ বেয়া কেটেগৰী যেন লাগিছে দেখোন তাইৰ৷ পিংককে ঠিকেই কৈছিল, ক্ৰুগুলত সকলো কথাতে বিশ্বাস কৰিব নোৱাৰি৷

কিৰিনৰ বিৰক্তি লাগিছে আৰু৷ মিছ ইউনিভাৰ্ছ হোৱাৰ নিচা কেতিয়াবাই ফাটিছে৷ তাই লগে লগে ঘুৰি যোৱাৰ সিদ্ধান্ত ল'লে৷ লগে লগে এয়াৰ ক্লেমোফেজ অন কৰিলে৷ লগে লগে তাই বীঙবোৰৰ পৰা নিৰাপদ দুৰত্বলৈ উৰি গল৷

চাৰিওফালে হাহাকাৰ, কলৈ গল ছোৱালীজনী৷ পুলিছো আহি পাইছিল৷ ৰঙা টি ছাৰ্ট পিন্ধাজনে বীৰদৰ্পে পুলিছ আৰু কেমেৰামেনক কিৰিনৰ ফলচ্ স্কিন্ দেখুৱাই আছিল৷ সাংবাদিকেও লাইভ কভাৰেজত ব্যস্ত৷

ওপৰৰ পৰা কিৰিনে সকলো চাই আছিল৷ পিংককে দিয়া ফলচ্ স্কীণখিনি নিউজ বীঙ আৰু ৰঙা বীঙৰ হাতত৷ কিৰিনৰ মনত দুষ্ট বুদ্ধি খেলালে৷ ওপৰৰ পৰা ৰে প্ৰয়োগ কৰি দুয়ো পিন্ধি থকা ফলচ্ স্কিনখিনি টানি লৈ তাই পুনৰ টৰেন্ট অভিমুখে প্ৰস্থান কৰিলে৷ পিংককক প্ৰেজেন্ট দিব তাই৷ ৰঙা স্কিনটোৰে পিংককক কি যে ধুনীয়া লাগিব৷

কেমাৰামেন বীৰেনে প্ৰমোচনৰ এই সুবৰ্ণ সুযোগ হেৰুৱাত নাই৷ সেই স্থানত উপস্থিত ৰাইজ আৰু টিভিৰ দৰ্শকে ঠিকেই দেখিলে, আকাশত উৰি থকা কাপোৰৰ পিছে পিছে দৌৰিছে উলংগ দুই যুৱক৷ পিছে পিছে অনুভৱ জানিবলৈ থ্ৰী ৱাইৰ সাংবাদিক৷