ধুম-৩ চালো

প্ৰায় এবছৰৰ মুৰত আজি চিনেমাহলত ভৰি দিলোগৈ৷ উদ্দেশ্য, য়শ চোপ্ৰা ৰোজগাৰ যোজনাৰ অন্তৰ্গত ধুম-৩ খন চাই অভিষেক বচ্চন আৰু উদয় চোপ্ৰাক উদগণি দিয়া আৰু লগতে নিশ্চয়কৈ আমীৰ খানক এক নতুন ৰুপত চোৱা৷

চিনেমাখনৰ আৰম্ভণিৰ দৃশ্যতেই জেকী শ্ৰফক আমীৰ খানৰ পিতৃৰ চৰিত্ৰত অভিনয় কৰা দেখি বুকুখন মোচৰ খাই উঠিল৷ ৰংগীলাৰ জেকী-আমীৰ যুটিলৈ মনত পৰি গ'ল৷ বলীউডৰ খান কেইজনৰ বাদে বয়স যে কাৰো বাবে ৰৈ নাথাকে সেয়া আকৌ এবাৰ বুজিলো৷

আগৰ ধুম কেইখন চোৱাৰ অভিজ্ঞতা আছিল বাবে মই বিশেষ একো ঘটনা আশা কৰা নাছিলো৷ ধুম ছিৰিজ সদায়েই ষ্টান্ট আৰু ভিলেইন পাৱাৰৰ বাবে জনপ্ৰিয়৷ জন আব্ৰাহাম, হৃত্বিকৰ পিছত সকলোৱে আমীৰ খানৰ বাবে আগ্ৰহেৰে বাট চাই আছিল৷ কেইটামান ডান্স ষ্টেপ আৰু কাটৰিনাৰ লগত থকা পেনপেনীয়া প্ৰেমৰ দৃশ্য এটা বাদ দি আমীৰে নিৰাশ নকৰিলে৷ কিন্তু এইখন চাগে আমীৰৰ একমাত্ৰ চিনেমা যিখনত মই তেওঁৰ অভিনয়তকৈ ষ্টাণ্টবোৰ চাই বেছি ভাল পালো৷

বাইক ষ্টাণ্ট, বিশেষ এফেক্ট আদিবোৰ এতিয়ালৈ মই দেখা সামসাময়িক হিন্দী চিনেমাবোৰৰ ভিতৰত শ্ৰেষ্ঠ তিনিখনমানৰ ভিতৰতে পৰিব বুলি মোৰ ধাৰণা৷

চিনেমাখনত এনেকুৱা কিছুমান দৃশ্য আছে য'ত যুক্তিৰ কোনো স্থান নাই৷ যুক্তিবাদী মন এটা লৈ এইখন চিনেমা চাবলৈ গ'লে আপুনি নিৰাশ হোৱাটো খাটাং৷ তেনেকুৱা দৃশ্য দুটামান ইয়াত লিখিবলৈ মন থকা স্বত্তেও চাবলৈ পাং পাতি থকাসকলৰ আগ্ৰহ কমি যাব বুলি লিখাৰ পৰা বিৰত থাকিলো৷ তথাপি শেষৰ দৃশ্যটোত চিকাগো পুলিচৰ কমাণ্ডোসকলে বেলেগ বেলেগ ডিজাইনৰ পেন্ট পিন্ধা দৃশ্যটো একেবাৰে বৰ হজম নহ'ল৷

নিসন্দেহে আমীৰ খান চিনেমাখনৰ মুখ্য আকৰ্ষণ৷ হয়তো এইখন চিনেমাৰ শ্বুটিংৰ বাবে তেওঁ বহুত কষ্ট কৰিছে, তথাপি অভিনয়ৰ ফালৰ পৰা চাবলৈ গলে এইখন তেওঁৰ শ্ৰেষ্ঠ চিনেমাৰ শাৰীত নপৰিব চাগে৷ আমীৰ খানক দিব লগা পাৰিশ্ৰমিক খিনি দিবলৈ আদায় কৰিবলৈ প্ৰযোজকে অভিষেকৰ পত্নী/প্ৰেমিকাৰ চৰিত্ৰ, কাটৰিনাৰ কাপোৰ কানি, কামাণ্ডোৰ পেন্ট আদি সকলোতে কম্প্ৰমাইজ কৰা যেন ভাব হ'ল৷ অভিষেক, উদয় চোপ্ৰাই কেনেকুৱা অভিনয় কৰিব ৰাইজে আগতেই জানে, এজনৰ মুখৰ কোনো অভিব্যক্তি নায়েই, এজনৰ আকৌ দৰকাৰতকৈ বেছি কেৰিকেছাৰ৷ কাটৰিনা হিৰোইন নে আইটেম গাৰ্ল আছিল সেয়া মোৰ বাবে অস্পষ্ট হৈ ৰ'ল৷

চিনেমাখনত ঘটনা বুলিবলৈ বিশেষ একো নাপালো৷ তথাপি যি যৎসামান্য ঘটনা আছে তাকে ইয়াত কৈ চাবলৈ পাঙি থকা সকলৰ আশাত এই মৰ ঠাণ্ডাত পানী ঢালিব বিছৰা নাই৷ গতিকে ঘটনা বা টুইষ্ট সন্দৰ্ভত সম্পুৰ্ণ নিমাত হৈ ৰলো৷ মোৰ ব্যক্তিগত মতামত অনুসৰি সৰ্বোচ্চ দুশ টকামানৰ (টিকট ১০০ টকা + বাকী ১০০ টকা পপকৰ্ণ, পেপচি আদিত) ভিতৰত মিলাব পাৰিলে ধুম-৩ খন সকলোৱে এবাৰ চোৱা উচিত,বিশেষকৈ যিসকলে মোৰ দৰে হলীউডৰ চিনেমাৰ ফৰফৰীয়া ইংৰাজী বুজি নাপায় হিন্দী চিনেমাতেই সন্তুষ্ট হৈ থাকে৷ এই টকাখিনিৰ ১৭৫ টকামান আমীৰ খানেই ৱচুল কৰি দিব৷